ازاى اعرف رقم المحضر اللى انا عملته ؟
أهم حاجة تفتكر اليوم اللى عملت فيه البلاغ أو المحضر والمكان اللى قدمته فيه لأن الأول ممكن تاخد رقم المحضر على طول وممكن تاخد رقم بلاغ وبعدين تاخد رقم المحضر المهم تكون فاكر اليوم والجهة وحقلك ازاى تعرف الرقم . .. لو قدمت مثلا البلاغ لرئيس النيابة أو المحامى العام أو النائب العام حتاخد رقم اسمه رقم عرايض بتاريخ اليوم اللى قدمت فيه البلاغ وبعدين حيتحول البلاغ لوكيل نيابة عشان يحقق فيه ويسمع أقوالك “شكوتك ” وكمان لو فى اصابات هوه اللى حيحولك على المستشفى عشان تعمل تقرير طبى وبعد كده حياخد المحضر رقم غير رقم البلاغ وغالبا حياخد رقم اسمه رقم ادارى وادارى يعنى لسة فى التحقيق وممكن ياخد رقم جنح يعنى المتهمين اللى انت شاكيهم حيتحولوا لمحكمة الجنح وده فى قضايا اللى الشرطة فيها متهمة باستعمال القسوة وممكن ياخد رقم جنايات وده يعنى ان المتهمين حيتحولوا لمحكمة الجنايات لو مثلا متهمين بتهمة احداث عاهة مستديمة … المهم متنساش يوم البلاغ والجهة اللى قدمت فيها البلاغ لأن ده اللى حيوصلك لقضيتك عشان تتابعها كويس وتصور المحضر وعشان لما تروح لمحامى او حد يساعدك حيطلب منك الرقم ده كمان. إيه حقوق المحبوس احتياطيا على ذمة قضية؟
لمحبوس احتياطيا ده إنسان اتهم في قضية والنيابة أو القاضي أمر بحبسه على ذمة قضية هوه متهم فيها وفيه قاعدة فى الدستور بتقول إن المتهم بريء حتى تثبت إدانته في محاكمة عادلة فيها تتوافر كل حقوقه وعشان كده ممكن ياخد براءة ويكون مظلوم فلازم يتعامل معامله ان برىء حتى النهاية فى اى مكان محجوز فيه سواء كان سجن او قسم شرطة وكمان فى ميزة انه ممكن يقضى فترة الحبس فى المكان القريب من المحكمة يعنى ممكن يفضل محبوس في القسم وميروحشى السجن ولو راح السجن ممنوع انه يختلط باى مسجون جنائى وليه مكان مخصوص كل اللى فيه زيه محبوسين على ذمه قضايا وممنوع دخول اى ظابط مباحث ليه، وكمان ممكن يلبس جوه مكان الحجز لبس عادى ويدخله اكل وشرب من اهله او اصحابه والزيارة فى اى وقت بطلب للنيابة العامة
جاري إضافة المزيد من الأسئلة.............
